TONA NA RINGKOT SIAN APOSTEL PAULUS

Turpuk Jahaon: “Onpe, hamu angka dongan, marlas ni roha ma hamu! Padenggan hamu ma dirimuna! Jalo hamu ma sude podangku!” (ay.11a).

1. Turpuk jahaonta on, ima tona panutup sian apostel Paulus tu huria na di Korintus. Dipasahat do tona on ala mangolu do huria Korintus di tongatonga ni situasi na so sonang. Pangkorhon ni portibi na jahat on dohot ragam ni pangunjunan na mangaririt boi do i manogu nasida tu bagasan ngolu na so pasangaphon Debata.
2. Hata ajar i, ima: (1). Asa marlas ni roha nasida di bagasan Tuhan i. (2). Mamarbenget diri (“ngolu na rimpas”). (3). Marsipoda-podaan, unang ma marsilojaan. (4). Saroha sapingkiran, lapatanna: marsada ni roha jala marparsaoran na dame. (5). Mangolu di bagasan dame dohot Debata, dongan jolma, nang diri sandiri (ay.11).
3. Ringkot situtu do tona ni si Paulus on di bagasan ngolunta. Molo taulahon angka on, na mangarade do hita laho mangolu hombar tu lomo ni rohaNa. Ima ngolu na mambahen las ni roha ni Debata. Ujungna, gabe pasupasu ma ngolunta tu dongan jolma dohot tu portibi on.
4. Na lima i naung nidok di ginjang, marharoroan do i sian ulaon ni Debata di bagasan Jesus Kristus. Ima parbue ni ulaon ni Tondi Parbadia. Asa ngolu sisongon i, gabe sitindangi ma i di tongatonga ni portibi naung magoan las ni roha, hangoluan na ture, hadameon dohot porsadaon. Ujungna, dilehon ma pasupasu ni Debata Sitolu Sada i tu hita (ay.13).

Tangiang: Ale Tuhan, pargogoi ma hami mangolu hombar tu lomo ni rohaM. Asa di tongatonga ni portibi na jahat on, tongtong hami pasangap GoarMu. AMEN.

SELAMAT MARAKHIR PEKAN, HORAS!