PAULUS PUNG PESAN PANTING

II Korintus 13:11-13

Nas: “Akang pung akher, sodara-sodara samua, basukacita lah, usahakan idop bae-bae supaya jadi sempurna. Tarima beta pung nasihat samua! (ay.11a).


  1. Katong pung bacaan ini, ini tu Paulus pung pesan akher par jemaat di Korintus. Pesan ini dong kasi tagal jemaat Korintus dong pung idop waktu itu seng gampang. Dunia pung pengaruh jahat deng akang pung tipu-tipu deng cobaan samua tu, bisa hela dong maso dalam idop yang seng kasi mulia Tuhan Allah.
  2. Nasihatnya tu bagini: (1). Spaya dong sanang hati di dalam Tuhan. (2). Kasi bae diri (“idop sempurna”). (3). Saling kasi nasihat, jang saling kasi jato. (4). Satu hati satu pikiran, artinya: basatu, idop rukun damai, (5). Idup damai deng Tuhan Allah, deng sesama, deng diri sandiri (ay.11).
  3. Paulus pung pesan ini jadi panting skali par katong pung idop jua. Kalo katong bekin ini samua, itu artinya katong sementara usahakan for idop iko Tuhan pung mau. Satu idop yang bekin sanang Tuhan Allah pung hati. Nanti lama-lama katong pung idop ni akan jadi berkat par orang laeng deng dunia.
  4. Lima hal yang tadi su sebut di poin dua tu, samua datang dari Tuhan Allah pung karja di dalam Yesus Kristus. Ini tu Roh Kudus pung karja pung buah. Jadi, idop yang bagitu tu, akan jadi saksi di tenga-tenga dunia yang su ilang akang pung sukacita, idop yang bae, kerukunan, deng damai. Akang pung akher, berkat dari Allah Tritunggal nanti turun par katong samua (ay.13).

Doa: Tuhan, kasi mampu katong for idop iko ale pung mau. Supaya di tenga-tenga dunia yang jahat ini, katong tetap kasi mulia ale pung nama. AMIN.


Bagikan


Masuk untuk meninggalkan komentar