PAULUS PE PESAN PENTING

Nas: “Akirnya, sodara-sodara samua, basukacita jo! Usahakan jo ngoni pe diri supaya jadi sempurna. Trima jo kita pe nasihat samua! (ay.11a).

1. Torang pe bacaan ini, ini noh Paulus pe pesan penutup for jemaat di Korintus. Pesan ini dorang sampaikan lantaran jemaat Korintus pe idup waktu itu nda gampang. Dunia yang jahat pe pengaruh deng samua depe godaan deng tipu-tipu, bisa hela pa dorang maso ka dalam idup yang nda memuliakan Tuhan Allah.
2. Depe nasihat itu bagini: (1). Supaya dorang basukacita di dalam Tuhan. (2). Kase bae diri (“idup yang sempurna”). (3). Saling kase nasihat, bukan saling kase jato. (4). Satu hati satu pikiran, artinya basatu, idup rukun deng damai, (5). Idup damai sejahtera deng Tuhan Allah, deng sesama, deng diri sandiri (ay.11).
3. Paulus pe pesan ini jadi penting skali for torang pe idup juga. Kalo torang beking ini samua, berarti torang da berusaha for idup sesuai deng Dia pe mau. Satu idup yang beking sanang Tuhan Allah pe hati. Nanti akhirnya torang pe idup akan jadi berkat for orang laeng deng dunia.
4. Lima hal yang tadi da sebut di poin dua di atas, itu samua basumber dari Tuhan Allah pe karya dalam Yesus Kristus. Ini noh buah dari Roh Kudus pe pekerjaan. Jadi, idup yang bagitu, akan jadi kesaksian di tenga dunia yang so ilang depe sukacita, kesempurnaan idup, kerukunan deng damai sejahtera. Akirnya, berkat dari Allah Tritunggal dicurahkan for torang samua (ay.13).

Doa: Tuhan, kase mampu pa torang for idup sesuai deng Ngana pe kehendak. Supaya di tenga dunia yang jahat ini, torang tetap memuliakan Ngana pe nama. AMIN.

SELAMAT BERAKHIR PEKAN