NASIHAT VOOR KASIH RANDAH DIRI.

Nas: “Sebab itu, kasi randah diri di bawa Tuhang pung tangan yang kuat, supaya nanti Dia kase tinggikan kamong pada waktu-Nya.” (ay.6).

1. Katong pung bacaan hari ini, itu nasihat dari rasul Petrus par kasih randah diri di bawa Allah pung kuasa. Ini pung arti, katong mangaku kalu katong ini tar mampu apa-apa deng cuma tagantong di Allah pung kuasa. Orang yang kase randah diri nanti dapa kase tinggikan pada waktu-Nya (ay.6).
2. Lanjut lai, Petrus kase nasihat par dong, di tenga-tenga penderitaan susa yang dong alami, supaya dong jang tako. Tuhang pung Firman ini kase jalan kaluar par samua yang biking katong khawatir deng cemas. Caranya itu deng sarakan samua beban khawatir par Dia. Karna Allah itu paduli skali deng palihara katong pung hidop (ay.7).
3. Sapa di katong samua yang seng pernah kase tinggikan diri? Dasarnya manusia itu sombong. Adam deng Hawa jato dalam dosa karna sombong, “mau jadi sama deng Allah.” Katong balajar par kase randah diri, mangaku katong pung kurang-kurang deng katong pung hidop yang tagantong di Allah. Orang yang kase randah diri, nanti Allah kase tinggikan dia pada waktu-Nya.
4. Lanjut lai, pertanyaan yang sama deng di point 3, sapa di katong samua yang seng pernah khawatir deng gelisah? Sebagai manusia badosa, pasti katong jua salalu rasa khawatir deng gelisah, apalai kalu katong ada dalam pargumulan. Ma ada jalan kaluar yang Tuhang kase, yaitu katong musti sarakan samua beban khawatir tu par Dia. Karna Dia itu paduli skali deng Dia yang palihara katong pung hidop.

Doa: Tuhang, tolong katong supaya jangan kase tinggikan diri. Kase katong sadar deng katong pung kurang-kurang, deng biar katong pung hidop ini cuma tagantong di Tuhang saja. AMIN.

SALAMAT BARJUANG (siz).